Околу 100 планинари од Делчево, Штип, Тетово, Куманово, Скопје како и гости од Норвешка денес го реализираа вториот планинарски марш од програмата на Друштвото за планинарски спортови ,,Трансверзалец” од Скопје насловена ,,12 Врвови”. Како втора целна точка во рамки на оваа програма беше врвот Бејаз Тепе кој се наоѓа на 1348 метри надморска висина на планината Средна. Како што истакна единствениот лиценциран планинарски водич за Југоисточна Македонија, Љупчо Чучуковски, кој воедно е и претседател на планинарскиот спортски клуб Голак од Делчево, планинарскиот марш бил со вкупна должина од 15 километри.
-Денешниот планинарски марш кој е дел од програмата ,,12 Врвови” започна во село Нов Истевник. Маршрутата потоа низ густи борови предели продолжи се до локалитетот ,,Кукуље” кој е геолошка природна реткост на земјени и песокливи кукли. Потоа продолживме се до врвот Бејаз Тепе висок 1348 метри надморска височина на планината Средна во областа Пијанец меѓу Делчево и Пехчево. Крајна дестинација ни беше историското село Разловци каде имавме заеднички ручек и дружење помеѓу планинарите, рече Чучуковски.
Членовите на ДПС ,,Трансверзалец” заедно со претседателот на ПСД ,,Голак” пред две недели ја мапираа и обележаа патеката со што движењето на учесниците на денешниот планинарски марш до Бејаз Тепе беше во целост олеснето.
Претходно во рамки на првата маршрута од програмата ,,12 Врвови” планинарите се искачија на врвот Голема Враца висок 2582 метри кој се наоѓа на јужниот дел од Шар Планина.
Leave a Reply