Коњска Дупка – најисточна пештера во Македонија

Коњска Дупка е пештера која се наоѓа во село Град и е кратка пештера. Според досегашните сознанија таа е најисточната пештера во Македонија. Изградена е од варовнички карпи кои се појавуваат на мала површина веднаш покрај селото Град.

Самиот влез е широк, а таков е и почетниот внатрешен дел кој претставува мала пешетерска сала долга 12 метри и широка околу 3-4 метри. На крајот од салата на левата (северна) страна, речиси вертикално се искачува еден канал со должина од 8 метри. Истиот излегува на површината, поточно на едно зарамнување десетина метри над влезот во пештерата, но е многу тесен и непрооден. Пештерата Коњска Дупка е сиромашна со пештерски накит, меѓутоа пронајдени се археолошки траги од некогашно човечко присуство. Покрај тоа, присутни се пештерски накити и неколку лилјаци од видот тробоен ноќник.

Без оглед на малата должина од само 28 метри, пештерата Коњска Дупка и целиот простор околу неа се многу интересни. Посебно е восхитувачки погледот од влезот на пештерата кон стрмните карпи во долината на Вачин Дол и селото Град.