Врвот „Руен“ и годинава беше зборното место на планинарите од Македонија и Бугарија кои учествуваа на традиционалната Меѓугранична средба „Балкан без граници“. Средбата која по 30 пат се одржа на најголемите височини на Осоговските планини е во организација на Еколошкото друштво „Еко Здравец 2002“ од Македонска Каменица, Планинарското друштво „Руен“ од Крива Паланка и туристичкото друштво „Осогово“ од Ќустендил.
Игор Коларски од Делчево е редовен учесник на овој настан и за него маршрутата за искачување до „Руен“ не била воопшто тешка.
-Во последните години сум редовен учесник на овој настан. Маршрутата на искачување до врвот, барем за мене, не е напорна, при искачувањето бевме поделени во помали групи, додека дел од учесниците излегоа на „Руен“ со теренски возила, мотори и велосипеди. Се на се, одлично дружење, кое вреди да се доживее, истакна Коларски.
Искачувањето, како што информираa организаторите, се реализираше од три појдовни точки, првата од Македонска Каменица, втората од Крива Паланка, додека третата од Ќустендил, Р Бугарија.
За сите планинари организаторот обезбеди храна и пијалок, а за сите помагатели беа доделени благодарници. Традиционалната средба „Балкан без граници“ е поддржана од општина Македонска Каменица и Рудник Саса.
Еве неколку фотографии кои директно од настанот ни ги испрати планинарот Игро Коларски
Leave a Reply