Екипата на „Биоплант“ победник на ноќниот турнир во баскет во Делчево

Екипата на Биоплант од Скопје е победник на вториот ноќен турнир во баскет кој во изминатите два дена се одржа во Делчево. Во финалето победничката екипа ја совлада екипата на Скај Кафе од Делчево со 21:15, резултат кој им ја донесе наградата вредна 15 илјади денари. За екипата од Скопје настапи поранешниот македонски репрезентативец Марко Дујковиќ кој го пофали домаќинот за добрата организација.

-Морам да упатам искрени честитки и да се заблагодарам на организаторите за добриот турнир. На турнири учествуваме не само во Делчево, туку секоја недела настапуваме секаде во Македонија и во странство, истакна Дујковиќ.

Претседателот на Советот на млади Никола Тренчевски, истакна дека Делчево може да биде задоволно од овој настан кој се планира и за во наредните години.

-Како Совет на млади сме задоволни од тоа што успешно заврши вториот ноќен турнир во баскет. Честитки до победниците и посебно до публиката која покажа дека е одлична публика. Се надевам дека спортскиот културен и забавен живот и во иднина ќе го негуваме на ваков начин, истакна Тренчевски.

За најдобар играч беше прогласен Христијан Ристов од екипата на Биоплант додека награда доби и највозрасниот кошаркар Ванчо Зрнцев, кој упати порака до младите компјутерите да ги заменат со било кој спорт.

-Кога можам на 57 години можам да играм да играм активно иако како хоби, им посакувам на сите да си дочекаат и да можат да играат. А за тоа треба да се сака спортот и да се практикува, затоа порачувам повеќе спорт и помалку компјутери, истакна Зрнцев.

Како награда од организаторот, второпласираната екипа доби паричен износ во висина од 10 илјади денари, додека третопласираната екипа Дастинг од Кочани доби 5000 денари.