Од понеделник времен режим на сообраќај поради реконструкција на дел од магистралата А3

Од понеделник во Делчево започнува рехабилитацијата на делницата од магистралниот пат А3 низ градот Делчево. Со рехабилитацијата, како што информираат од фирмата изведувач, ГД „Гранит“ ќе биде опфатена магистралната улица долж булеварот „Македонија“, поради што од понеделник ќе биде воведен изменет режим на сообраќај на споменатиот патен правец.
 
-Од понеделник, 12 август, започнува рехабилитацијата на споменатата делница. Работите ќе се изведуваат согласно со изменет режим на сообраќај во 11 фази од крстосница до крстосница и тоа започнувајќи од патниот правец од с.Ѕвегор кон Делчево со затворање на десната коловозна лента и пренасочување на сообраќајот на левата коловозна лента на која за времетраење на работите сообраќајот ќе се одвива двонасочно сѐ до крстосницата со улица „Скопска“, известија од „Гранит“.
 
По истиот принцип на пренасочување од крстосница до крстосница, како што додаваат времениот режим ќе се одвива континуирано на десната коловозна лента на булеварот сѐ до влезот на Делчево, за потоа да се започне со изведување на работите во обратен правец кон село Звегор.
-За воспоставување на времениот режим ќе бидат поставени сообраќајни знаци и опрема со која ќе се води сообраќајот со цел овозможување безбеден и непречен сообраќај за сите учесници. Се апелира до граѓаните да ја почитуваат поставената сигнализација, сообраќајните правила и прописи, да се движат со намалена брзина и зголемена претпазливост, додадоа од „Гранит“.
 
Времениот режим на сообраќај ќе биде во важност се до завршување на рехабилитацијата на делницата од магистралниот пат А3 низ градот Делчево и магистралната улица булевар „Македонија“, за што граѓаните ќе бидат навреме известени.

Be the first to comment

Leave a Reply

Your email address will not be published.


*