Планинарите од „Голачка срна“ успешно реализираа тура околу село Бигла

-Стартот на денешниов планинарски марш беше од месноста наречена „Крстот“ помеѓу маалата Бојчовци Белчинци во атарот на с. Бигла. Стартната позиција на деветкилометарската маршрута беше од месноста „Крстот“, место кое е посветено на Св. Димитрија, каде луѓето од Драмче и Бигла се собираат на заедничка трпеза на поголемите верски празници. Тука е подигнато и спомен обележје со крст изградено 1929 година. Планинарите го посетија и Основното училиште „Јане Сандански“, кое сега не работи , а објектот е во ужасно лоша состојба, со искршени прозорци, распаднат под, демонтирана електрична инсталација, информираше Маневски.

-Тука некаде планинарите имаа мала пауза што ја искористија за разговор со мештанинот Ванчо Атанасов, кој откако станал стечаен работник егзистенцијата на семејството ја обезбедува со екстензивно замјоделство и сточарство. Тука љубезно не поздрави и неговиот внук второодделенецот Филип кој секојдневно оди на училиште во ООУ „Ванчо Прк“ во Делчево, поминувајќи по дваесетина километри во еден правец. Дедо му наутро го вози со тракторот до бигланското училиште на стариот пат Делчево Кочани преку Грлани , од каде со другите ученици имаат организиран превоз до Делчево и назад, раскажа Маневски.

Најмладиот член на денешната планинарската експедиција беше Бојана Милева, осмооделенка во ООУ „Ванчо Прке“  која ја презеде улогата на фото и видео снимател за оваа планинарска репортажа подготвена од колегата Васил Маневски која има и второ продолжение.