Делчево го чествува ликот и делото на „Св.Климент Охридски“

Во Делчево денес се слави ликот и делото на Св.Климент Охридски. Со пригодна свеченост во дворот на училиштето кое го носи името на македонскиот просветител денес пред неговата биста беше прочитан пригоден реферат за неговиот лик и дело, додека свежо цвеќе положија претставници на училиштето, локални институции, здруженија и граѓани.
 
По повод патрониот празник на училиштето синоќа се одржа и Свечена академија, на која во својот говор директорот на деветолетката ,,Св.Климент Охридски”, Горан Димитровски, истакна дека училиштето и оваа година постигнало одлични резултати на сите полиња.
– Во изминатата година училиштето ги реализираше сите проекти предложени од Министерство за образование и наука. Учениците активно учествуваа на сите спортски настани организирани од Федерацијата на училишен спорт и на истите остварија одлични резултати. Во училиштето наставниците постојано професионално се усовршуваат за да можат да ги следат примените на наставните програми, се со цел да одржуваат квалитетна настава во рамки на воспитно-образовниот процес, рече меѓу другото Димитровски.
Во рамки на Свечената академија, беа доделени наградите за најдобрите ученици кои учествуваа на литературниот и ликовниот конкурс на тема ,,Мојот град”.
 
Во рамки на одбележувањето на патрониот празник на деветолетката ,,Св.Климент Охридски” претходно беа организирани спортски натпревари во мал фудбал и ракомет. По повод празнувањето на Св.Климент Охридски утрово се одржа богослужба во црквата Успение на Пресвета Богородица во Делчево, додека граѓаните празникот го одбележаа и пред параклисот посветен на просветителот Св.Климент Охридски.

Be the first to comment

Leave a Reply

Your email address will not be published.


*