Постхумно излезе од печат романот ,,Алтан” од Павлинка Ѓорѓијоска

Денес постхумно излезе од печат романот ,,Алтан” од авторот Павлинка Ѓорѓијоска. Како што информира познатиот сатиричар Миле Ѓорѓијоски, сопруг на авторката, ова е второ постхумно издание на нејзиното творештво.

-Поради прераната смрт Павлинка не дочека да биде издаден романот Алтан, кој исто како и нејзиниот претходен роман ,,Петра” излегува постхумно. Денес сум среќен да ја споделам информацијата дека по долго време и вредна работа околу подготвувањето на ракописот за печатење, конечно дојде време ,,Алтан” да ја види светлината на денот, соопшти Ѓорѓијоски.

Романот ,,Алтан”, како што додава, е приказна за едно богато турско семејство, кое доаѓа до банкрот поради лошите вложувања на берзата.

-Главен јунак во романот е Керем, чија прабаба е Македонка која заминува за Македонија да го бара скриеното богатство од неговиот прадедо, но тука се запознава со Анѓа и работите заминуваат в друг правец, вели Ѓорѓијоски за сижето на романот.

Кориците и илустрациите на романот ,,Алтан” се на познатиот карикатурист Миро Георгиевски. Се очекува романот зедно со претходните два романи на Ѓорѓијоска “Во тунелот” и “Петра”, да биде претставен пред љубителите на пишаниот збор на 10 март 2020 на денот на нејзиниот роденден.

Авторката Павлинка Ѓорѓијоска е родена 1961 година, а ракописот за Алтан го остави во 2015 година кога почина на 54 годишна возраст. 

Be the first to comment

Leave a Reply

Your email address will not be published.


*