Почна изградбата на пречистителната станица за вода во Делчево

Со пригодна свеченост на која присуствуваа премиерот на Владата на РСМ, Димитар Ковачевски, министерот за животна средина и просторно планирање, Насер Нуредини, заменик-амбасадорот на Швајцарската Конфедерација во Скопје, Лусијан Егертер, претставници од фирми- парнтери во проектот и граѓани на Делчево, беше означен почетокот на изградбата на новата пречистителна станица за вода за пиење со придружни објекти во рамките на големиот Проект за подобрување на водоснабдувањето на Делчево.  

Оваа капитална инвестиција е само една во низата инвестиции за долгорочен развој на Република Северна Македонија, потенцираше премиерот Ковачевски, при што истакна и дека еден од столбовите на политиката на Владата е рамномерен регионален развој, затоа што секој град, секој регионот во државата заслужува да биде убаво место за живеење кое и понатаму ќе се живее во просперитет.   

– Политиките што ги креира Владата се сопфатни и никого не изоставуваат, без разлика дали станува збор за проекти за развој на општините, за мерки за ублажување од енергетската криза. Од грижа за најранливите граѓани, за пензионерите, преку мерки за обезбедување на ликвидноста на стопанството, субвенционирање на струјата со 80% за над 600.000 домаќинства и над 72.000 мали потрошувачи фирми кои ги вработувааат најголем дел од вработените во државата, до мерки за прехранбената индустрија за да се нмалат цените на основните производи, до поддршка за развојот на општините, мислиме на секого, затоа што сите граѓани за нас се подеднакво важни.  Како Влада поддржавме инвестиции од над 250 милиони евра во општините, ќе го поправиме она што со децении не е направено, секој заслужува квалитетен живот, потенцирапе Ковачевски.  

Со реализацијата на проект се решава децениски проблем во Делчево и носи чиста вода за пиење во секој дом во Делчево и минимум загуби на вода, истакна во своето обраќање градоначалникот Трајковски.  

-Проектот „Подобрување на водоснабдувањето на Делчево“ се имплементира изминативе 4 години, период во кој се реализираа сите неопходни административни работи, но се работеа и елаборати, анализи, за да се најде најсоодветното решение за конечниот резултат-чиста вода за пиење и минимум загуби на вода. Паралелно, се гради нова водоводна линија во две делчевски села Габрово и Ѕвегор со што жителите за прв пат ќе добијат современ водоводен систем и ќе се приклучат на градскиот водовод. Во рамките на проектот влегуваат и изградбата на фотоволтаична централа и оперативна зграда со лабораторија, изградба на прекидна комора на главната доводна цевка од браната Лошана до станицата во с. Тработивиште, реконструкција на главната водоводна цевка од с. Тработивиште до Делчево и реконструкција на бунарите во Делчево и с. Тработивиште, како и реконструкција на резервоарот за вода во близина на с. Ѕвегор, истакна градоначалникот Трајковски.  

Министерот Нуредини истакна дека Проектот за водоснабдување на Делчево има уште една многу важна компонента, за работа на пречистителната станица за вода ќе се користат најдобродостапните техники засновани на обновливи извори на енергија.  

– Од аспект на МЖСПП сакам да нагласам дека интензивно се работи на поддршка и на другите општини за изградба на инфраструктура за водоснабдување  и одведување отпадни води. Во моментот одобрени се средства во висина од 55 милини евра прекукредитната линија на ЕБОР. Наскоро ќе биде објавен јавен повик и средствата ќе бидат достапни за општините, истакна Нуредини.  

Швајцарија долги години обезбедува стратешка поддршка на регионот на Брегалница, во износ од повеќе од 50 милиони CHF до денес.  

-Kако продолжение на оваа поддршка и посветеноста да им се помогне на жителите на општина Делчево, горд сум што Швајцарија одлучи да придонесе во напорите за подобрување на состојбата со водата за пиење. Очекувам за две години повторно да се собереме овде за да прославиме официјално пуштање во употреба на пречистителната станица заедно со граѓаните на Делчево, истакна заменик-амбасадорот Лусијан Егертер.  

Проектот за подобрување на водоснабдувањето во Делчево, е вреден 7,3 милиони швајцарски франци. Од нив 6 милиони швајцарски франци се донација од Швајцарската Конфедерација, 1, 3 милиони швајцарски франци е инвестиција од Владата, преку Министерството за животна средина и просторно планирање, а 30.000 швајцарски франци е учество на Општина Делчево.

Be the first to comment

Leave a Reply

Your email address will not be published.


*