Беровскиот градоначалник Звонко Пекевски денеска оствари средба со младите и надежни таленти Екатерини Самаропулу и Сара Видинска и нивниот ментор Бистра Поп Ѓорѓиева, кои неодамна се вратија од Бановичи, Босна и Херцеговина, каде што успешно се пласираа на Меѓународниот натпревар на млади истражувачи и техничари, ,,Бановичи 2023″.
Пекевски им честиташе за успехот потенцирајки го остварениот резултат како афирмација на Општина Берово во меѓународни рамки.
-На нашите таленти им посакав низ работа и труд, да продолжат да постигнуваат високи резултати. Преку ,,Народна Техника” од Берово, голем број на ученици, успешно се пласирале на бројни натпревари, со што, користеле и стипендии преку Министерството за образование и наука, донеле успеси и за општината и ја претставиле во вистинско светло, истакна Пекевски.
Младите истражувачи и нивниот ментор на средбата ги пренесоа своите впечатоци од натпреварувањето, убавите дружења и истакнаа дека тоа е едно прекрасно искуство за нив.
Екатерини Самаропулу, во категоријата агротехника, со проектот ,,Хидропонична кула”, освои златен медал, а Сара Видинска, во категорија високоградба, со проект ,,Концертна хала во Сиднеј”, освои благодарница.
Leave a Reply