Претседателката Сиљановска-Давкова ги прими братчињата од Делчево: Симбол на младински спортски дух и истрајност

Претседателката на Република Македонија, проф. д-р Гордана Сиљановска-Давкова, денеска оствари прием со младите пливачи од Делчево – братчињата Филип, Максим и Калин – кои годинава по вторпат успешно го испливаа Илинденскиот пливачки маратон, во должина од 2,5 километри.

„Инспиративен е нивниот подвиг“, истакна претседателката, поздравувајќи ја нивната храброст и посветеност. „Освен што се гордост за своите родители, тие се и пример за врсниците, соучениците и целата генерација.“

Братчињата, кои двапати се соочиле со водите на Охридското Езеро и двапати излегле како победници, се симбол на младинска волја, упорност и спортски дух. Тие покажаа дека кога љубовта кон спортот е водилка, предизвиците стануваат мотивација, а не пречка.

Претседателката додаде дека токму ваквите примери треба да се афирмираат во јавноста, бидејќи младите како Филип, Максим и Калин претставуваат вистинска алтернатива на насилството и говорот на омраза. Наместо тоа, тие поттикнуваат натпревар на знаење, издржливост и посветеност.

Приемот беше исполнет со топлина, разговори и признание за трудот и подвигот на овие млади херои, кои и понатаму се решени да ги надминуваат границите – во спортот, но и во животот.

Be the first to comment

Leave a Reply

Your email address will not be published.


*