
По повод Светскиот ден на литературата за деца, кој традиционално се одбележува на роденденот на Ханс Кристијан Андерсен, Јавната локална библиотека „Илинден“ од Делчево организираше едукативно и креативно дружење со ученици од второ одделение од ООУ „Св. Климент Охридски“.
Настанот помина во духот на детската фантазија, со читање и прераскажување на познати бајки, препознавање литературни ликови и создавање сопствени приказни. Учениците имаа можност да патуваат низ светот на литературата, запознавајќи ги јунаците од делата како Алиса во земјата на чудата, Малата сирена, Пинокио, Грдото пајче и Црвенкапа.
Преку интерактивни активности, децата ги откриваа пораките за добрина, храброст и искреност, додека низ игра и креативност создаваа сопствени „мали светови од зборови“. Особено внимание привлече и запознавањето со ликовите од Мачорот во чизми, Јованче и Марика и Волкот и седумте јариња.
Од библиотеката информираат дека овој ден традиционално се одбележува секоја година, со цел да се поттикне љубовта кон книгата уште од најрана возраст и да се развива читачката култура кај најмладите.
Настанот беше реализиран со поддршка од наставничките и учениците, на кои од библиотеката им упатија благодарност за учеството и придонесот во создавањето на една вистинска бајковита атмосфера.
Светскиот ден на литературата за деца е потсетник дека детството започнува со приказна, а љубовта кон книгата трае цел живот.

Leave a Reply