Видео: Делчево во знакот на автомобилите: Tuning Car Show 2026 собра автоентузијасти од цела Македонија

Второто издание на атрактивниот автомобилски настан понуди моќни и модифицирани возила, дрифт, музика, дружење и награди во повеќе категории

Делчево викендов беше во знакот на автомобилите, адреналинот и тјунинг-културата. На паркингот кај Градскиот пазар се одржа второто издание на „Tuning Car Show Delchevo 2026“, настан кој на едно место собра голем број автоентузијасти и посетители од повеќе градови во Македонија.

Моќни, модифицирани, ретки и внимателно сочувани автомобили беа главниот дел од понудата, а посетителите имаа можност одблизу да ги разгледаат возилата и да разговараат со нивните сопственици.

Организаторите велат дека зад секое возило стојат многу време, труд, средства и љубов, токму поради што секој автомобил кој учествува на настанот заслужува посебно внимание и почит.

Особено внимание привлече дрифт-програмата, која внесе дополнителна доза адреналин и ја надополни атмосферата на настанот. Специфичниот звук на моторите и гумите, заедно со музиката и големиот број посетители, создадоа вистинска автомобилска атмосфера.

На паркингот можеше да се видат возила од различни категории и генерации, од класични модели до современи автомобили со сериозни тјунинг-модификации. Дел од учесниците пристигнаа организирано и со повеќе возила, што дополнително ја покажа развиената тјунинг-сцена во земјава.

За организаторите, целта не е само еднодневно собирање на автомобили, туку создавање традиција и препознатлив настан кој од година во година ќе привлекува сè поголем број љубители на автомобилите.

„Нашата желба е Tuning Car Show Delchevo од година во година да расте, да собира сè поголем број автоентузијасти и Делчево да стане препознатливо место на автомобилската сцена во Македонија и пошироко“, истакнаа организаторите.

Настанот беше реализиран со поддршка од Општина Делчево, како и од повеќе спонзори, партнери и пријатели. Организаторите упатија благодарност до сите кои помогнаа во реализацијата, но и до учесниците и посетителите кои придонесоа за атмосферата.

На крајот, најдобрите автомобили во повеќе категории беа наградени со пехари, како признание за вложениот труд и креативноста на нивните сопственици.

Второто издание на „Tuning Car Show Delchevo“ покажа дека интересот за автомобилската култура во Делчево и регионот расте, а градот полека се позиционира и како место каде што љубителите на автомобилите можат да се соберат, да ги покажат своите проекти и да споделат заедничка страст.

Автомобили, дрифт, музика, дружење и адреналин – Делчево уште еднаш покажа дека има место и за вакви атрактивни настани.

Be the first to comment

Leave a Reply

Your email address will not be published.


*