Делчево, 29 октомври 2026 година – Со мотото „Заедно преку границите, заедно за развој“, Делчево денеска беше центар на одбележувањето на Денот на европската соработка и 36-годишнината од програмата Interreg IPA. На настанот беа презентирани импресивните резултати од повеќегодишното партнерство меѓу Северна Македонија и Бугарија, коешто преку стотици реализирани проекти носи видливи придобивки за локалните заедници, економијата и граѓаните од двете страни на границата.
Лидерски позиции и милионски инвестиции во регионот
Ирена Бабамова Стојчевска од Заедничкиот секретаријат на програмата Interreg IPA Бугарија – Северна Македонија истакна дека од 2007 година па до денес, низ трите програмски периоди, се поддржани 206 проекти со учество на 463 организации и со вкупен буџет од речиси 67 милиони евра.
„Зад овие бројки стојат инвестиции во туристичката и зелената инфраструктура, заштитата на природното и културното наследство, претприемништвото и локалниот развој. Но, највредниот резултат е довербата меѓу луѓето и институциите од двете страни на границата“, нагласи Бабамова Стојчевска. Таа потсети дека во актуелниот програмски период (2021–2027) веќе се потпишани шест проекти за зелена инфраструктура во вредност од 5,5 милиони евра, десет интегрирани проекти за туризам вредни 9,5 милиони евра, како и 11 договори за поддршка на економски оператори вредни над 5,5 милиони евра. Како клучна стратешка инвестиција беше нагласен и идниот граничен премин Клепало, чија целосна реализација се очекува до крајот на 2029 година.

Државниот секретар во Министерството за локална самоуправа, Владимир Стојановиќ, истакна дека европската соработка директно се прелева во секојдневниот живот на граѓаните, посочувајќи го новоизградениот скејт-парк во Делчево како одличен пример за обезбедување простор за спорт, млади и активен живот.
Делчево и Благоевград: Две децении успешна соработка и нови капитални проекти
Градоначалникот на Општина Делчево, Иван Гоцевски, нагласи дека границите не смеат да бидат бариери, туку мостови кои спојуваат. Општина Делчево и Општина Благоевград веќе две децении градат цврсто партнерство, со четири успешно завршени и петти актуелен проект во вредност од околу 1 милион евра.
Координаторот на овој тековен проект, Тони Стојменовски, презентираше конкретни податоци за реализираните зафати на терен:
- Скејт-парк: Изграден во Делчево со вредност од 2,4 милиони денари и веќе пуштен во употреба.
- Регулација на Брегалница: Се работи на уредување на речното корито во должина од 300 метри. Благодарение на оваа техничка документација, обезбедени се средства за дополнителни 300 метри, а во тек е потпишување договор за уште 500 метри низводно – со што за неполна година Делчево ќе добие уреден кеј и шеталиште во должина од три километри од двете страни на реката.
- Регионални туристички и културни иновации: Во Благоевград се изведува опсерваторија со дигитален планетариум (редок капацитет во поширокиот регион), се изработува дигитална туристичка мапа со тродневни тури, тројазичен стратешки документ за туризмот и Инстаграм-тура, со што се очекува прилив од најмалку 1.000 нови туристи годишно.
Придонесите на Источниот плански регион и Општина Берово
На настанот својата активност ја претстави и Центарот за развој на Источниот плански регион, кој преку прекуграничните програми реализирал десетина проекти. Фокусот е ставен на интегрираниот развој на туризмот (реконструкција на културно-историски локалитети и планинарски домови) и проектите за зелена инфраструктура во соработка со Општина Штип и Општина Гоце Делчев.
Општина Берово се пофали со импресивно портфолио од шест завршени и еден актуелен проект од 2011 година наваму. Меѓу значајните инвестиции се воспоставувањето на Бизнис-инкубаторот, првата фаза од уредувањето на кејот на Брегалница, енергетската санација на градинката во селото Русиново, поставувањето на филтер-станица и мобилна апликација за Беровското Езеро, набавката на противпожарна опрема и обуката на млади волонтери-пожарникари преку проектот „Волонтери преку граница“. Во моментот, Берово го имплементира и проектот за нискојаглеродна велосипедска и пешачка патека во должина од 22 километри околу Беровското Езеро, сè до граничниот премин Клепало.

Раководителот на Заедничкиот секретаријат во Ќустендил, Тони Јакимовски, потсети дека Денот на соработката се слави низ Европа веќе 15 години преку над 1.500 настани, доближувајќи ги европските вредности до над 57 милиони граѓани.
Настанот во Делчево понуди и поглед кон новата програмска рамка 2028–2034 година, а беше заокружен со богата културно-уметничка програма, настапи на локални хорови и фолклорни ансамбли, како и најава за утрешната теренска посета на проекти и симболично засадување дрво како симбол на трајното пријателство и соработка.

Leave a Reply