Библиотеката „Илинден“ го збогати книжевниот фонд со црковна литература

Како дел од соработката помеѓу Јавната локална библиотека „Илинден“ и Брегалничката епархија деновиве во библиотеката пристигнаа книги со црковна литература. Како што информираше директорката Билјана Петровска, црковната литературата веќе од утре, ќе биде достапна за читателската публика.

-Нашата библиотека располагаше со многу малку црковна литература, од тие причини во соработка со свештениците од православната црква „Успение на Пресвета Богородица“, а преку Брегалничката епархија набавивме црковна литература. Соработката со Брегалничката епархија ќе продолжи и во иднина. Сакам да ги информирам сите наши членови и читатели кои што се заинтересирани дека веќе од утре можат да дојдат во библиотеката и да изнајмат вакви книги, рече Петровска.

Од библиотека ги известуваат читателите дека утре пред децата од воспитно-образовните установи, „Македоника литера“ ќе ја презентира најдобрата кинеска литература за деца.

-Утре со почеток во 12 часот во читалната на библиотеката наши гости ќе бидат претставници од издавачката куќа „Македоника литера“. Тие ќе ја презентираат најдобрата кинеска литература за деца а исто така ќе имаат и продажна изложба. Ги поканувам нашите сограѓани да ја посетат оваа продажна изложба и да си купат по промотивна односно по ниска цена, дополни Петровска

Од библиотеката соопштија дека во преговори со други издавачки куќи во наредниот период предвидени се и други вакви слични настани.