Дождот не ги спречи пензионерите од Делчево, уште од раните утрински часови да го чекаат својот ред пред локалните банки, со надеж дека ќе успеат да ја добијат платежната картичка, а со тоа и најавените 6.000 денари, како дел од пакетот мерки на Владата за поддршка на пензионерите со ниски пензии.
За поголемиот дел од пензионерите кои решија да кажат збор-два за оваа поддршка, иако според нив не е доволна, сепак ќе ги ублажи последиците од кризата и во период кога се ближат празници, ќе помогне во домашниот буџет.
-Мене ме следува, велат дека ќе можеме прехранбени производи да купиме. Очекуваме да ги добиеме овие 6.000 денари кои иако се малку, колку-толку за Нова година ќе бидат од помош, вели пензионерка од Делчево.
Пензионерите со повисоки пензии ја поздравија одлуката. Велат на човек и 1.000 денари да му дадеш во вакви моменти ќе помогнат, а камоли 6.000 денари, кои за посиромашните ќе помогнат.
-Помошта не е доволна, но подобро нешто, отколку ништо, вели пензионерот Спиро Митевски од Делчево.
Освен пензионерите со ниски пензии, помош очекуваат и лицата прогласени за Технолошки вишок.
-Јас сум технолошки вишок, земам до пензија 8.500 денари. Досега платежни картички со најавените 6.000 денари се уште не е дадено на никој, заради тоа и гужви се содаваат, вели граѓанин со ниски примања кој ја очекува својата прва пензија.
Меѓу пензионерите имаше и такви кои се уште не знаат каде да се обратат за да се информираат околу најавената помош.
-Има најава, ама не знаеме дека да се обратиме, вели граѓанин на Делчево.
Граѓанка на Делчево со ниска пензија додава дека иако зема пензија 9.500 денари, не е запознаена за поддршката.
-Нека дадат за сите исто, децидна е исто така пензионерка од Делчево.
Пензионер со повисоки примања посочува дека главниот проблем е тоа што повеќе од 3 години не се покачени пензиите. На тоа според него треба да се работи, а не со ваква поддршка која според него е промашена работа.
Пред влезните врати во трите банки во Делчево во изминатите три дена е вистински метеж. Пензионерите редот го почитуваат, но самата гужва која се создава како што додаваат го дава одговорот дека паричната поддршка пред Новогодишните празници сите со нетрпение ја очекуваат.
Leave a Reply