Волшебна кутија што ги оживува приказните: Креативна работилница во ЈЛБ „Илинден“ – Делчево

Еден тивок ден во библиотеката, меѓу високите полици со книги, започна едно вистинско волшебство. Преку креативната работилница „Мојата волшебна книга во кутија“, Јавната локална библиотека „Илинден“ – Делчево уште еднаш ја потврди својата улога како простор каде што приказните оживуваат, а фантазијата нема граници.

Инспирирани од приказната за малото девојче Маја, која во библиотеката пронаоѓа мистериозна кутија што ги чува сите некогаш прочитани приказни, децата открија важна порака – ако престанеме да читаме, приказните и ликовите исчезнуваат. Затоа, читањето не е само навика, туку магија што ги поврзува генерациите.

Со многу боја, имагинација и тимска работа, малите учесници изработија свои волшебни кутии во кои „оживеаја“ омилените ликови од книги и сликовници. Секоја кутија беше единствена, со своја приказна, емоција и порака, а заедничката нишка беше љубовта кон книгата и читањето.

Посебна вредност на работилницата беше и тоа што волшебната кутија остана во библиотеката – отворена за сите деца кои ќе ја посетат ЈЛБ „Илинден“. Тие ќе можат да додаваат свои ликови, соништа и фантазии од омилените приказни, продолжувајќи ја магијата заедно.

Денот заврши без екрани и мобилни телефони – наместо тоа, децата играа друштвени игри како „Не лути се човече“, домино и други игри кои поттикнуваат дружење, комуникација и заедничка радост.

Од ЈЛБ „Илинден“ – Делчево порачуваат дека библиотеката не е само место за книги, туку простор за игра, учење, креативност и заедничко растење, каде што секое дете може да ја пронајде својата приказна.

Be the first to comment

Leave a Reply

Your email address will not be published.


*