По четврти пат се одржа фестивалот „Јаков од Камена Река“ во Македонска Каменица

Во Македонска Каменица се сумираат резултатите по одржаното четврто издание на Меѓународниот фестивал „Јаков од Камена Река“, манифестација посветена на афирмацијата на македонскиот јазик, култура, традиција и наука. На завршниот настан кој свечено го отворија директорот Миле Ѓорѓијоски и градоначалничката Соња Стаменковска, а пред присутните се обратија и новинарот и публицист Љупчо Јолевски. Дел од програмата беше и читањето поезија од Тихомир Јанчовски, интерпретирана од артистот и водител Игор Трпчевски, како и настапот на актерот Благоја Чоревски и членовите на фолклорната група Копачка.

Во рамки на фестивалот беше организиран и саем на книги на досегашни лауреати и членови на Советот на фестивалот, додека вечерта беа доделени признанија на повеќе истакнати поединци и организации за нивниот придонес во културата, науката, уметноста и промоцијата на македонскиот идентитет.

Меѓу наградените годинава се проектот Македонисимо за афирмација на македонската музичка култура, проф. д-р Боце Митревски за достигнувања во науката, д-р Сања Пановска и проф. д-р Горан Калоѓера за научен придонес, Тошо Филиповски за публицистика и промоција на современата музика, како и Константин Качев и проф. д-р Стојко Стојков. Признанија добија и Металотехника-Прилеп за иновации и Макпрогрес за поддршката во организацијата на фестивалот.

Во својата честитка до директорот Миле Ѓорѓијоски, Здружението „Надеж – Норе“ и сите организатори и учесници градоначалничката Стаменкова ја потенцираше нивната посветеност и визија да создадат  фестивал што од година во година расте во значаен и препознатлив културен настан.

Фестивалот го носи името на Јаков од Камена Река – првиот македонски печатар, кој во 16 век во Венеција ја обновил печатницата на Божидар Вуковиќ и во 1566 година го отпечатил познатиот „Часослов“ на црковнословенски јазик. Овој значаен споменик на писменоста денес претставува дел од македонското културно наследство, а еден од зачуваните примероци се чува во НУБ „Св. Климент Охридски“.

Со фестивалот „Јаков од Камена Река“ организаторите продолжуваат да ја негуваат и промовираат љубовта кон македонскиот јазик, кирилицата, традицијата и културното наследство, истовремено давајќи поддршка на македонските автори и творци од различни области

Be the first to comment

Leave a Reply

Your email address will not be published.


*