Видео: ДЕЛЧЕВО ДОБИ СОВРЕМЕН СКЕЈТ-ПАРК: Нов простор за младите, спортот и прекуграничното пријателство

ДЕЛЧЕВО, 19 октомври 2026 година (Текст: Валери Спасевски) – Општина Делчево официјално го стави во употреба новоизградениот современ скејт-парк, кој претставува нова спортско-рекреативна содржина наменета за младите, авантуристите и љубителите на алтернативните спортови. Скејт-паркот е дел од поширок инвестициски циклус за унапредување на спортската и туристичката инфраструктура во граничниот регион.

На свеченото пуштање во употреба, градоначалникот на Општина Делчево, Иван Гоцевски, истакна дека ова ново катче има многу поголемо значење од самата инфраструктура.

„Денес не отвораме само нов простор, туку простор за енергија, храброст, нови пријателства и нови можности. Вистинската вредност на овој скејт-парк нема да се мери само во изградените патеки и елементи, туку во насмевките, новородените пријателства и храброста повторно да се стане по секој пад. Ова е место каде што ќе се учи дека вистинската победа е во меѓусебното охрабрување и поддршка“, порача Гоцевски.

Инвестиција од ИПА Програмата за прекугранична соработка

Изградбата на скејт-паркот е дел од проектот „Интегрирани прекугранични туристички акции во Благоевградско-Делчевскиот регион“, финансиран преку Програмата за прекугранична соработка помеѓу Бугарија и Северна Македонија (ИПА).

Вредност на скејт-паркот: 2,4 милиони денари.

Вкупна вредност на целиот проект: Околу 1 милион евра (за двете партнерски општини Делчево и Благоевград).

Партнери во реализацијата: Општина Делчево, Општина Благоевград, Здружението „Регионален центар за застапување“ од Делчево и туроператорот „Алфатур“ од Бугарија.

Раководителот на одделението за ЛЕР во Општина Делчево, Тони Стојменовски, посочи дека ова е петти успешен проект што се реализира во партнерство со збратимената општина Благоевград, овозможувајќи градење мостови меѓу заедниците и подобрување на квалитетот на живеење.

За значењето на европските фондови за развој на локалните средини се обрати и Јане Вангеловски, раководител на прекуграничната програма од Министерството за локална самоуправа, кој честиташе за успешната реализација и истакна дека Делчево предничи во искористувањето на ИПА фондовите за проекти што директно им користат на граѓаните.

Комплетно уредување на спортско-рекреативниот комплекс

Градоначалникот Гоцевски најави дека со поставувањето на скејт-паркот не завршуваат обврските за уредување на просторот:

Дополнителна опрема: Веќе се поставени канделабри за осветлување за користење во вечерните часови, а во следната фаза следи и целосно оградување на просторот.

Заштита и уредување на коритото на Брегалница: Во пакет со овој проект се гради и кејот на реката Брегалница во должина од 300 метри возводно, со што се спречува ризикот од поплави и се формира естетска и функционална целина со спортскиот центар.

Реконструкција на спортската сала: До крајот на оваа недела треба да започне и реконструкцијата на градската спортска сала, со што заедно со стадионот, базенот и тениските игралишта, Делчево добива затекоа затворен и современ спортски комплекс.

Настанот заврши со симболично сечење на црвената лента и демо-програма во која младите скејтери веднаш ги тестираа патеките и реквизитите на новиот парк.

Be the first to comment

Leave a Reply

Your email address will not be published.


*