Кочани трча напред: FREEDOMRUN FR26 и Божиќна трка ‘26 со порака за нов почеток

Спортот како симбол на заедништво, надеж и враќање на вистинските вредности во градот

Кочани повторно се подготвува да живее, да се движи и да испрати силна порака за обнова и заедништво преку организацијата на двете значајни спортски случувања – Божиќна трка ‘26 и FREEDOMRUN FR26.

Организаторот со јасна визија и искрена намера објаснува дека овие трки не се само спортски настани, туку симбол на нов почеток и колективна сила.

„Им должиме на генерациите што доаѓаат. Како град поминавме низ тешки моменти. Под името „Пулс“ сите почувствувавме тежина, и секој од нас носи дел од таа приказна. Но животот продолжува и ние сме тие што треба да го вратиме Кочани повторно на нозе“, порачува организаторот.

Токму затоа, идејата зад овие трки е да се поттикне позитивна промена која започнува од секој поединец, а потоа се претвора во колективна енергија.

Во време кога се потребни вистински вредности, пораката е јасна – враќање кон:

  • другарството
  • слогата
  • емпатијата
  • заедништвото
  • љубовта
  • гостопримството

„Трките не се само спорт. Тие се симбол на движење напред, симбол на енергија и начин повторно да се собереме, да се погледнеме во очи и да се потсетиме дека не сме сами“, се наведува во пораката.

Секој чекор на трката носи порака – да не се откажеме, да продолжиме и да веруваме. Со организацијата на Божиќна ‘26 и FREEDOMRUN FR26 се испраќа силен сигнал дека Кочани има сила, има срце и оди напред.

Организаторот нагласува дека оваа иницијатива е водена од искрена љубов кон градот и желба да се поттикне промена преку конкретни дела.

„Не ни требаат само зборови, ни требаат дела. Им должиме град во кој младите ќе сакаат да останат. Им должиме надеж и пример“, додава тој.

Со овие настани, Кочани не само што организира спорт, туку гради приказна за обнова, заедништво и враќање на животот во градот.


Пријавување за учество:
👉 https://freedomrun.race.mk/

Be the first to comment

Leave a Reply

Your email address will not be published.


*