Јавен повик за учесници на „Пијанечки денови на сливата 2026“ во село Град

Општина Делчево распиша јавен повик за пријавување учесници на манифестацијата „Пијанечки денови на сливата 2026“, која годинава ќе се одржи на 3 ноември во село Град, со почеток во 11 часот.

Манифестацијата, која Општина Делчево ја организира во соработка со локални институции, здруженија на граѓани, приватни компании и поединци, ќе биде посветена на промоцијата на сливата и производите од слива, како еден од традиционално најзастапените земјоделски производи во Пијанец.

Во рамки на централниот настан е предвиден натпревар во печење ракија под мотото „Мојата сливова ракија е највесела“, како и подготовка или промоција на мармалад, слатко и компот од слива. Посетителите ќе имаат можност да видат и традиционални бели пецива со производи од слива, како и штандови со традиционални производи, ракотворби и други карактеристични производи од Пијанечкиот крај.

Подготовката на ракија, мармалад и слатко, како и уредувањето на штандовите, ќе имаат натпреварувачки карактер, додека останатите активности ќе бидат ревијални.

Од Општина Делчево ги повикуваат заинтересираните индивидуални земјоделци, физички и правни лица да се пријават за учество.

За пријавените учесници Општината ќе обезбеди потрошни материјали, меѓу кои дрва, шеќер и брашно, тезга за изложување и продажба на производите, како и промотивни материјали.

Предвидени се и парични награди. За највесела ракија ќе бидат доделени прва награда од 8.000 денари и втора награда од 6.000 денари. За најсладок мармалад или слатко е предвидена награда од 3.000 денари, додека најубаво уредениот штанд ќе биде награден со 3.000 денари.

Рокот за пријавување е 29 октомври 2026 година. Заинтересираните учесници треба да пополнат и да поднесат пријава во архивата на Општина Делчево. Пријавата може да се преземе од веб-страницата на Општината или да се подигне во архивата.

Лице за контакт е Ванчо Новоселски, на телефонскиот број 070 309 630 или на електронската адреса v.novoselski@yahoo.com.

Целта на манифестацијата е промоција на сливата и традиционалните преработки од слива, но и на храната и ракотворбите карактеристични за Пијанечкиот крај.

Од Општина Делчево посочуваат дека изборот на село Град за годинашното издание е дел од идејата вакви и слични манифестации секоја година да се организираат во различно населено место. На тој начин, како што наведуваат, се придонесува за промоција и уредување на селата, нивно претставување како туристички дестинации и промоција на сместувачките капацитети, со што се очекува да се поттикне развојот на руралниот туризам во Општина Делчево.

Be the first to comment

Leave a Reply

Your email address will not be published.


*